lunes, 20 de febrero de 2017

Desmontando o motor Larrán.


Este pasado venres, os socios Javi Naveira e Lucas subiron a bordo da Balbina para empezar a quitar os pernos que suxeitan o famoso motor Larrán da Balbina.


A idea non é outra que a de empezar ca restauración "en serio" do motor, e de paso, aproveitar para limpar e revisar o asento no barco.


Pola mañán xa se deixou o motor libre para empezar á tarde a quitalo e levalo para o noso local.



Ca axuda de Jose Gómez, ós mandos da carretilla, levantámolo do barco e o deixamos no local, onde en breve empezaremos a limpalo a fondo.


Unha vez co motor no local, era tal a felicidade dos patexeiros que ata amenizamos con música a chegada de tan insigne hospede.

video

Xa vos iremos contando como evoluciona.


o Palmeirán

miércoles, 9 de noviembre de 2016

Varada anual da Balbina

Onte martes, subeu ó carro a Balbina, para a súa varada invernal anual.




Ten unha chea de mexillón que apañarán esta mesma tarde os compañeiros Luisjo e Dolores. Igual lles dá para vender.

Tamén lle lavarán un pouco a cara ca hidrolimpadora.

Logo se irán facendo traballos de mantemento, que falta lle fai.



Hai que cambiar moitas táboas da obra morta, o trancanil, sorraina, cintón, caurel..... puffffffffffffffff!!!!!!!

A ver se o tempo nos deixa traballar nela, non coma outros anos que chovía e chovía sen parar.

viernes, 8 de enero de 2016

Empeza o ano a bordo da Balbina

Empezamos este 2016 facéndolle unha visita á Balbina.


 Alá se foi o primeiro de ano, o patexeiro Javi, a achicar e baldear o barco. Facíalle boa falta.



Como Javier non é unha persoa que se ande con chiquitas, levou un xerador cunha bomba e pegóulle unha boa limpeza á cuberta, que estaba chea de cunchas de mexilón que deixan as gaivotas.



Logo achicou a sentina e deixou a Balbina en perfectas condicións.


Agora a esperar que veña un pouco de bo tempo para poder traballar algo no barco. De momento seguen as choivas.


domingo, 26 de abril de 2015

Barco ó mar

O pasado martes a Balbina deixou o carro para voltar ó mar.

Nesta varada aproveitamos para facer unhas cantas reparacións de urxencia.

Limpamos e pintamos toda a cuberta. Fíxose o caseto do motor. Tamén rematamos as brazolas que faltaban.


Dóuselle unha man de pintura ó pañol de proa.

Repasamos a obra viva, lixándoa, metendo espichos, recravando onde se necesitaba e dándolle Silver e patente.

Na obra morta botámoslle unhas cantas táboas na popa, un tramo do cintón.


E o máis novedoso é o cambio de cor. Abandoamos as cores clásicas da Balbina para pintala do noso corporativo beige Patexeiros, co cintón en marrón.


Tivemos que abandoar o carro sen rematar de todo os traballos porque tiñan que entrar varios barcos ó estaleiro.

Como vedes nas fotos fáltanos por instalarlle a cheminea, os portillos do caseto, arranxar a sorraina e parte do caurel e pintar o folio dun costado e o nome.


A manobra foi perfecta.


Queremos agradecer a colaboración do Estaleiro-Carpintaría Lorbé por axudarnos e asesorarnos con varias cuestións, por facilitarnos a estancia durante tantos meses.

Tamén nesta ocasión agradecemos a colaboración de Pinturas Proa e de Xylazel. Dúas empresas galegas comprometidas coa preservación do patrimonio marítimo.

video

Seguiremos facendo as reparacións restantes a flote.

martes, 14 de abril de 2015

Cuberta casi rematada

Ó longo desta pasada semán estivemos dándolle varias máns de Xylazel á cuberta e ó caseto da Balbina, para que quede ben protexida.


Leva tres máns, dúas delas cunha mixtura de alquitrán e linaza e a terceira só de Xylazel para que protexa todo o conxunto. Parece que nos está dando bo resultado esta mixtura.



Tamén nos atopamos cunhas táboas podres na popa e procedemos a sustituílas.


Temos tamén que cambiar uns barraganetes, a sorraina, parte do cintón, parte do trancanil e unha parte importante do caurel.



Son cousas que se lle van atopando todos os anos, debido á falla de mantemento. Se o barco estivera sempre ben baldeado, non tería estes problemas, pero é difícil estando fondeado.

A ver se somos quenes de arranxalo todo, senón logo teremos que facelo a flote, pois o tempo de varada vai rematando.

Esta semán seguiremos traballando nela, sobre todo na obra viva, para deixala lista e proceder a darlle a imprimación e a patente.



domingo, 29 de marzo de 2015

Arranchando o caseto e saneando a obra morta.

Este venres e sábado varios socios estivemos traballando no barco insignia da flota patexeira, a Balbina.

Xa a mediados de semán Pepe, o carpinteiro, instalóunos o caseto na cuberta do barco.


O venres acheguéime a darlle unha man de Xylazel roble + alquitrán vexetal + aceite de linaza polo interior do caseto.


Pero a gran afluencia de patexeiros a traballar foi onte sábado onde Lucas, Pablo, Moncho, Dolores, Jaime, Miguel Marta (que pasou a saudarnos e xa lle endiñamos a rebarbadora para cortar uns tornillos) e máis eu, estivemos facendo diversos traballos no barco.


Eu encarguéime primeiro de darlle ó caseto unha man da mixtura da que falamos anteriormente. Con esta mixtura pretendemos que o alquitrán vexetal e o aceite de linaza penetren na madeira e a enriquezan coas suas propiedades e co Xylazel pretendemos protexer todo o conxunto dos raios UV.


Como había bastante xente para traballar, Lucas púxose a rascar a súa dorna, a Lala, xa que ainda non lle fixera ese mantemento dende que a mercou.

A Pablo, que según temos entendido é moi ligón, pois para facerlle honra á súa fama adxudicámoslle as distintas lixadoras e estivo todo o día ocupándose do cuartel da bodega de popa, da obra viva, e tamen da cuberta por dentro. Ligar non ligaría, pero lixar, lixou cousa fina.



Moncho estivo saneando unhas táboas que apodreceran na popa, para empezar logo a meterllas novas.





É incrible, que en tres anos, que foi cando o barco afrontara unha grande  reparación na popa, a madeira esté neste estado. Está claro que a falta de mantemento, porque o barco non dispón de amarre e está todo o ano fondeado, dificultando que poidamos acceder habitualmente a él para baldealo, e tamén que a madeira de agora non é como a de antes, provocan esta situación.


Temos que ir sustituíndo varias pezas no barco, sobre todo as máis próximas á cuberta por atoparse pasmadas ou podres.

Fixádevos neste barraganete que parecía novo por fora, pero como o arrincamos coa man, e como se atopa totalmente podre por dentro.


Moncho estivo frasquiando as novas táboas.


Mentras, Pablo lixaba a parte de abaixo da cuberta e Jaime a impregnaba de alquitrán vexetal mixturado con aceite de linaza.

Eu púxenme a facerlle o barraganete da popa. Como non tiñamos madeira axeitada, utilicei unha peza de madeira procedente da Balbina, de cando a desmontáramos para facerlle a cuberta nova. Quitéille a cravazón e cepilléina, e o carballo estaba como o primeiro día. Reutilizamos unha peza de madeira de finais dos anos 60. 

Rematamos sobre as 19:30 para asistir á inauguración do monumento ás Xentes do Mar que tiña lugar a uns metros de onde estábamos traballando. E a xente do mar merece todo o respecto.


domingo, 22 de marzo de 2015

Varios traballos

Ó longo desta semán levamos ó cabo varios traballos no noso barco insignia.


 Por unha parte estámoslle facendo o caseto do motor. Ó final optóuse por facelo de chapa fenólica, xa que non dábamos feito o de madeira. A ver que resultado nos dá.


Moncho e Eva estiveron tratándoo con Xylamon Fondo.


Palmeirán e Dolores estiveron lixando e dándolle Silver á zona da hélice e ó temón.



Os alumnos do curso de carpintaría, estiveron tamén practicando nela, detectando puntas podres e facéndolle espichos.





Na vindeira semán seguiremos traballando nela.