BO NADAL

Pintando o último cuartel

Pois, de novo retomando os traballos na Balbina. Onte venres e hoxe sábado tocóulle a rematar aquel cuartel que deixamos pendente dunha táboa antes do verán.

Xa lle colocamos a táboa que faltaba, tapamos con tapíns os tornillos, lixamos, tratamos con fondo protector e hoxe púxenme a aplicarlle unha man de Xylazel pola parte de dentro.

Palmeirán

Limpeza e achique da tempada invernal

Hoxe venres achegámonos Pepe e máis eu ata a Balbina, para limpar a cuberta dos restos de cunchas de mexilón e outras lindezas coas que nos agasallan as gaivotas ó longo do verán.

Nesta foto xa quitáramos as cunchas de mexilón

Había moito traballo. Estivemos a bordo preto de duas horas, limpando, rascando, baldeando e achicando o barco.

Pepe co bruso/brux

Tamén tomamos as medidas para empezar coas brazolas do caseto e do último cuartel, que xa o temos feito no taller.

Pepe estivo rascando e limpando mentras eu baldeaba e achicaba. Tamén baldeamos todo o barco polo interior para salgar un pouquiño a madeira.

Quedou listo para revista. Agora a ver se colocamos as brazolas, armamos o caseto e o deixamos totalmente tapado.

Palmeirán.

A Balbina xa está no mar

Onte martes a iso das tres e media da tarde, A Balbina volveu para o seu fondeo en Lorbé. Despóis de 6 meses varada, durante os cales non poidemos facer nela todo o que tiñamos pensado.

Esta temporada de varada, o tempo xogóunos unha mala pasada e poucas veces se pudo ir a traballar no barco, ainda que non toda a culpa a tivo o tempo, senón tamén a escasa man de obra patexeira que apareceu por Lorbé.

Agora ainda nos queda pendente facerlle a ponte, rematar de calafateala,  e uns pequenos retoques meores na cuberta.

En canto iso esté listo empezaremos co motor.

Para a manobra de onte martes xuntámonos en Lorbé, Jaime, que trouxo a zodiac e se encargou do remolque ata o fondeo, Dolores, Martiño e máis eu.

A manobra foi moi rápida e sen contratempos, só tivemos un pequeno percance cando íamos a chegar ó fondeo e o motor da zodiac se parou e non quería arrancar, co que tivemos que botar o bicheiro a unha boia  e manternos alí ata que Jaime consigueu poñelo de novo en marcha. Logo se daría conta de que eran uns cables que facían un mal contacto.

Quedou no fondeo e agora imos a preparar a Desexada para que quede lista para navegar e preparar tamén o noso Encontro, que está previsto para o vindeiro 22 de xuño.

Palmeirán

Fin de semán previo á botadura

Pois si, xa temos que botar o barco ó mar o vindeiro martes. O inverno foi duro e casi non nos deixou traballar e a Balbina terá que ir para o mar sen o seu caseto. Polo demáis vai sair casi toda pechada cos cuarteis listos, a falta de poñer as brazolas de un para meterlle o cuartel que casi temos listo.

O venres pola tarde Jaime se adicou a pastear algunhas pequenas grietas mentras eu limpaba e lle daba unha man de Xylazel roble á cuberta de proa.

O sábado pola mañán tivemos visita de varios socios patexeiros para ver como nos iban os traballos.

Despois Miguel Marta se puxo a facer varias cousas, pastear, pintar, etc. Moncho Cerviño púxose a darlle unha man de Silver Proa á obra viva, mentras eu me poñía a axustar os cuarteis, que fixen un pouco xustos (manía miña de facer as cousas ó milímetro) e tiñamos medo que ó inchar se atrancasen.

Pola tarde quedéime eu só e despois de lixar suavemente a cuberta lle din unha man de Xylazel roble ó resto da cuberta ata chegar á proa, onde o deixara o día anterior.

Hoxe domingo quedaron en ir Ana e Miguel a pintar o folio e Moncho a darlle Silver polo costado de babor, e, se lle da tempo, empezar xa a  darlle patente. Martiño posíblemente tamén se achegue para axudar ca patente.

O tempo bótasenos enriba e o martes ás 3 da tarde irá para o mar. Logo teremos que rematar os traballos a flote.

Palmeirán.

Semán de traballo en Lorbé

Esta semán démoslle duro á Balbina xa que hai que botala ó mar nuns días.

O sábado da semán anterior, Martiño estivo limpando ben o casco para empezar a pintar, rascando moi ben a obra viva, e atopando algunha sorpresa na obra morta.

Martes pola tarde estiven achicando o barco que tiña un pouquiño de auga, e vendo o panorama que atopamos no trancanil de estribor que tiña a parte exterior totalmente podre.

O xoves pola tarde acheguéime ata alí a pintar un pouquiño. Dinlle unha man do seu azul característico polo costado de babor e un cachiño da amura de estribor.

O venres volvín a Lorbé e seguín pintando. Tamén se achegaron Carlos Quintas, que fixo un bo traballo limpando e aspirando a bodega e pañol de popa, Francisco, que estivo pouco tempo pero botóunos unha man rascando a hélice e cortando unhas argollas enferruxadas que tiñamos nos costados, e Moncho que se puxo tamén a pintar.

O sábado pola mañán estivemos outro comando patexeiro.

 Jaime, estivo pintando o courel e o cintón de vermello.

Miguel Marta e máis eu estivemos preparando unha peza para meter nunha parte do trancanil que atopamos con podrén, e que xa non nos dá tempo a cambiar desta varada, así que optamos por saneala un pouco e  botarlle un remendo para que non dé moito o cante.

Tivemos unha xornada moi desapacible e tiñamos que fuxir a cuberto cando caían fortes chuvascos e pedrizo, tendo que tapar o barco de cada vez que nos collía na faena. O vento ademáis pegaba bastante forte e dificultábanos ainda máis o traballo.

Eu xa me quedei alí para a tarde que chegou Moncho de novo para botar unha man e estivemos calafateando un pouco a cuberta nas táboas lindantes co trancanil e as brazolas, e dándolle unha man de Xylazel Roble á última parte da cuberta que botamos.

Xa deixamos postos un par de cuarteis.

E deixamos o barco tapadiño, esperando que esta semán podamos facer algo e rematar o traballo para que vaia casi cuberta para o mar, a falta do caseto.

Palmeirán.

Sempre falla algo

E hoxe casi deixaba rematado o último cuartel, pero de novo me quedei sen madeira da medida necesaria e quedou a última táboa sen poñer.

Xa cortei a táboa que falta, e ainda así teño que regruesala pois era dunha medida máis ancha pero teño que utilizar o que temos polo taller xa que ainda non fixemos outro pedido de madeira.

Aproveitei para facer os tapíns e tapar todos os tornillos, con madeira de iroko.

Unha pena o problema coa madeira, pois iba sobrado de tempo e xa o daba por rematado hoxe. Non pudo ser.

Palmeiran.

Outra mañán de sábado no taller

Hoxe xa chegamos algo tarde a Lorbé, casi eran as 12.

Xuntámonos Miguel Marta e máis eu, e acabamos de rematar o montaxe do bastidor. Logo nos puxemos a montar as táboas da cuberta do cuartel.

Tivemos que facer un parón para ir buscar máis tornillos que quedamos sen eles. Tempo que aproveitei para ir ver a pequena reparación que fixo o carpinteiro Pepe na popa da Balbina. Non puden quitarlle fotos xa que non levara a cámara nin o teléfono.

Unha vez trouxemos os tornillos continuamos ca montaxe, e así a deixamos cando rematamos sobre as 2 e media da tarde. Faltan cinco taboas por fixar ó bastidor.

O seguinte día a ver se podo rematala.

Palmeirán.

Proseguimos os traballos

E chove, e chove, e sigue chovendo, un día si e outro tamén.

Hoxe acheguéime a Lorbé despóis do parón da Semán Santa e de varias semanas de estar saturado por varias cuestións persoais.

Achiquei a Balbina, que como sempre, ó estar ainda aberta colle bastante auga.

Logo fun ó taller a ensamblar as pezas do bastidor para empezar a montar o último cuartel pendente, e así o deixei cando saín de Lorbé.

O carpinteiro ainda non nos empezou a cambiar unhas táboas na popa. Ese traballo encargámosllo ó estaleiro porque eu ainda non teño dominada a técnica de poñer as táboas do forro, ainda que estou seguro que se me poño, non quedaría mal de todo, pero tampouco se pode facer todo.

Mañán xa non podo ir, porque tamén hai que atender á familia, non só vai ser traballar.

Palmeirán

Todas as pezas listas para ensamblar

O sábado, como sempre, xa vai sendo o mesmo todos os días que me achego a Lorbé, non parou de chover en todo o día.

Fun unhas horiñas pola mañán para rematar de preparar todas as pezas para o último cuartel, o do sollado de proa.

Cando cheguei, xa andaba por alí Miguel Marta, que como vía que eu tardaba xa se dispoñía a irse porque tiña compromisos, así que de novo me quedei só.

Preparei as dúas últimas táboas que faltaban, dándolle a curvatura da cuberta e tamén o traveso de reforzo que irá no medio.

Agora, a ver cando podo ir a ensamblala porque me veñen ahí un par de semáns de moita ocupación.

Palmeirán.

Empezando o último cuartel

Este venres pola tarde, aproveitando o bo tempo (por fin vimos os raios do sol), acheguéime a Lorbé.

O primeiro foi achicar a Balbina que tiña xa bastante auga.

De seguido me puxen a tomar as medidas para a madeira que necesitamos para facer as brazolas que faltan, que son a do sollado de proa e a do motor.

Tamén xa tomei medidas para empezar co último cuartel, e en canto a bomba acabou de achicar, xa me fun ó taller empezar a preparar toda a madeira.

Cortei todas as táboas da cubrición xa á medida necesaria.

Tamén xa preparei as táboas que conformarán o bastidor do cuartel, dándolle a curvatura necesaria para adaptarse á inclinación da cuberta a unha delas.

A ver se o sábado podo deixala montada.

Palmeirán

Sellando e pintando

Outro día máis de choiva en Lorbé. Alí estivemos dende as 11, e non parou de chover en toda a mañán, polo que outro día que non podemos ir traballar no barco.

Era día post asamblea, polo que nada máis chegar me puxen a desmontar a mesa e gardar as sillas que utilizamos na Asamblea.

Deseguido chegou o compañeiro Miguel Marta e se puxo a sellar os tres cuarteis que xa temos feitos, e eu me puxen a pintar o último que fixen e tamén darlle unha segunda man por dentro ós demáis.

E pouco máis poidemos facer, xa que non podemos ir ó barco a tomar medidas para empezar a facer as brazolas que faltan. A choiva lévanos boicoteando todo o inverno.

Rematado o cuartel

Pois hoxe xa rematei o cuartel do pañol de proa.

Como xa víramos na entrada anterior, por cuestións de dispoñibilidade combinei a madeira de xatoba para o bastidor, coa de piñeiro para a cubrición.

Para darlle o mesmo toque de contraste ca o pañol da bodega de popa, tamén lle puxen os tapíns en madeira oscura, para eso aproveitei unha peza que había polo taller, que penso que é madeira de elondo, pola dureza e a cor.

Dinlle dúas máns de tratamento xylófago e queda pendente de aplicarlle o Xylazel roble.

Agora toca ir de novo á cuberta facer as brazolas da bodega de proa para poder empezar o cuartel desa bodega e rematar de cubrir todo o barco, a falta da caseta do motor.

Palmeirán.

Bastidor para o cuartel de proa

Hoxe xa deixei rematado o bastidor para empezar a poñer as táboas do cuartel do pañol de proa.

Non me chegan, pola medida,  as táboas de xatoba, para facelo completo, así que vou facer o bastidor de xatoba e poñer as táboas da cubrición de piñeiro. Éche o que hai. Este ano a economía está mal para todos e hai que botar man do que hai polo taller.


Non puden quedarme a rematar, así que espero facelo o seguinte día que vaia por Lorbé.

Palmeirán.

Brazolas do pañol de proa

Hoxe, con moito frío en Lorbé, o termómetro marcaba 5º, coloquei as brazolas do pañol de proa.

Falta sellalas e tapar os tornillos con tapóns de madeira.

Tamén collín as medidas e teño preparadas as primeiras táboas para empezar a facer ese cuartel.

Palmeirán

Rematando a cuberta

Esta mañán de sábado xuntámos en Lorbé, Miguel Marta e mais eu para traballar algo na Balbina e intentar rematar de botar as táboas da cuberta.

Estivemos primeiro no local preparando as táboas para poñer na cuberta.

Unha vez na Balbina tardamos bastante en asentalas, porque o primeiro bao da proa ten uns pequenos defectos e houbo que traballar as táboas para asentalas ben.

Ainda así despóis de varios cortes, cepilladas e lixadas conseguimos que quedasen bastante ben.

Démoslle tratamento xilófago e empezamos a presentar as brazolas do pañol de proa.

Hoxe recibimos a visita de varios patexeiros que pasaron a darnos ánimos. Primeiro chegou Martiño que chegou ás súas horas habituais (nunca antes das 12:30), jejeje. E logo chegou a familia numerosa de Ana, Miguel e os seus pequenos, que por moito que lles insistin non quixeron subir ó barco. ¡¡¡A ver se nos van a sair de secano!!!!

Sobre as 2 e cuarto empezamos a recoller, pois xa non daba tempo a máis. As brazolas quedaron medidas e pendentes de corte e colocación.

A ver se o seguinte día, se non chove, quedan colocadas e xa podemos empezar co cuartel do pañol de proa.

Palmeirán

Facendo as brazolas do pañol de proa

Outro día máis sen poder ir á cuberta da Balbina. Caían chuzos en Lorbé.

Así que me puxen a preparar as brazolas para o pañol de proa.

Xa tiña preparados uns listóns de eucalipto ben curadiño e paséinos pola serra para facerlles unha entalla que encaixará nas táboas da cuberta.

Logo dinlle tratamento funxicida.

A ver se mañán se poden colocar.

Tamén aproveitei para darle Xylazel roble á tapa da fogonadura que fixen o día anterior.

Palmeirán.

Sigo na cuberta

Onte martes acheguéime a Lorbé a ver se remataba a cuberta.

Non tiña madeira de medida suficiente para rematar toda, así que só pechei o tramo que fixera o día anterior.

Non me chegou a madeira para rematar as dúas taboas da proa.

Aproveitei tamén para facer a tapa provisional da fogonadura..

Palmeirán

Traballando na cuberta

Ademáis do gripazo descomunal que me tivo fora de combate por dúas semáns, o tempo tampouco nos axudou moito. Este inverno foi moi duro en temporais e choivas. De todos os días que estiven en Lorbé, dende que varamos a Balbina, prácticamente choveu todos, co que só podía ir á cuberta nos momentos que había unha pequena tregua coa choiva.


Hoxe, sábado, por fin, por fin un día que non chove e puden ir traballar á cuberta da Balbina, ainda que non puden traballar todo o tempo que quixera porque había outros compromisos  a nivel de relacións da Asociación que tamén houbo que atender.

Estiven dúas horas escasas nas que me adiquei a achicar a Balbina,  que volvía a ter bastante auga, e a despexar a cuberta de proa para intentar rematar de botarlle eses tramos que quedaron sen botar do ano anterior.

As dúas táboas de madeira que quedaban só me deron para o tramo que vedes.

Agora teño que preparar unha pouca madeira máis para colocar o que falta e rematar.

Intentaréino pola semán se o tempo me deixa.

Palmeirán.

Segunda man ós cuarteis

Hoxe venres, o tempo non deixaba nin sacar a cabeza fora. Choiva, e choiva, e máis choiva.

Houbo que traballar dentro do local, así que aproveitei para darlle a segunda man de Xylazel lasur ós dous cuarteis que xa están feitos, e así deixalos a secar e en canto sequen, listos para colocar.

O do pañol de popa, tratado con Xylazel lasur Teka, con esta segunda man queda un pouco máis oscuriño, pero moi bonito.

O da bodega de popa tamén colleu unha tonalidade máis bonita nesta segunda man, co lasur Roble que lle demos.

Como acabei moi rápido de aplicarlle a segunda man, e como non se podía sair afora a cuberta da Balbina, nin se podía levantar polvo no local preparando máis madeira, aproveitei para ordear un pouquiño o local patexeiro, colocando a madeira a utilizar toda xunta, e limpando un pouquiño, que sempre se agradece ter o taller adecentado.

A ver se o tempo nos deixa continuar na cuberta.

Rematados os cuarteis de popa

Pois hoxe rematei os dous cuarteis de popa, o do pañol de popa e o da bodega.

Lixei os tapíns que quedaron pegados do día anterior, e dinlle unha man de Xylazel roble ó cuartel da bodega de popa.

No cuartel do pañol ainda faltaba meter unha táboa e máis o pecho, e hoxe coloquei as dúas.

Tamén lixei todos os tapíns deste cuartel e apliquéille unha man de Xylazel teka, como vedes queda moi ben.

Agora queda empezar coas brazolas da caseta do motor e da bodega e pañol de proa, pero se o tempo segue sen darnos tregua teremos que pospoñelo ata que despexe.