Xornada de achique e traballo nos cuarteis

Hoxe facía un frío en Lorbé que botaba para atrás. Estiven esperando a que parara de chover para achicar a Balbina, pois xa tiña moita auga.

Por fin dou unha tregua e conectei a bomba e a deixei achicando unhas horas ata que quedou casi vacía.

Mentras, e como o tempo segue sen deixarnos traballar na cuberta da Balbina, continuei traballando nos dous cuarteis de popa que están a medio rematar.

Fíxenlles os tapíns para os dous, encoléinos e coloquéinos.

O do pañol de popa segue pendente de colocar unha taboa, ó final vou a ter que usar dúas, ainda que quede un pouco asimétrico, pero hai que usar o material do que dispoño no taller.

Así queda este cuartel cos tapíns colocados a falta de lixalos.

No cuartel da bodega de popa tamén deixei colocados todos os tapíns, que os fixen nunha madeira oscura (de samanguila) para que fixeran un pouquiño de contraste co claro do piñeiro.

Ainda que os hai que deixar secar, fixen unha pequena proba lixando uns cantos para darme unha idea do acabado final, e así vai quedando.

Tamén lle din unha segunda man de fondo protector.

A ver se o seguinte día os podo deixar rematados e listos para darlle o lasur Xylazel.

Palmeirán.

Casi listo o cuartel da bodega de popa

Tal e como víchedes na entrada anterior, xa deixara cortadas as táboas para cubrir o bastidor.

Hoxe reforcei as unións cuns ángulos de madeira e logo empecei a colocar as táboas. Deixéille un pequeno alero de 2 cms por estética e para poder levantala con facilidade.

O ensamble das táboas realízase bastante rápido. Son machiembradas, porque era a madeira que tiñamos dispoñible no local e hai que utilizala. Aprétoas un pouquiño co sarxento e atornilloas.

Os tornillos van embutidos e logo levarán uns tapíns.

Unha vez rematada de ensamblar dinlle unha pasada ca lixadora de banda para igualar as unións e matar os cantos.

Rematado o proceso de lixado apliquéille unha man de Xylazel Fondo para protexelo dos fungos da pudrición e da bichería.

Dinlle tamén pola parte de dentro e así a deixei por hoxe.

Agora hai que esperar a que seque ben, poñerlle os tapíns, lixalos, darlle unha segunda man de fondo protector e aplicarlle o lasur Xylazel Roble.

Así que penso que mañán non o vou a facer porque con este tempo non vai secar ben. Xa veremos.

Palmeirán

Empezamos o ano traballando na Balbina

Pois despois de estar coa preparación da Gala de peche de tempada da Asociación e tras o parón navideño que me fun para a miña terra, empezamos o ano traballando na Balbina.

O venres acheguéime a ela ó estaleiro para botarlle un vistazo e baldeala con auga do mar, que xa estará cansada de beber tanta auga doce que caeu nas navidades.

Despóis de baldeala funme ó local ca idea de empezar a preparar o armazón para o cuartel da bodega de popa.

Cortei e preparei as táboas e dinlles a curvatura da cuberta.

Despóis de lixalas e igualalas empecei a facerlles as colas de milano para as unións.

Antes de irme deixéinas presentadas.

O sábado pola mañán fíxenlle un reforzo central ó armazón, ensambléino e encoléino e quedou casi listo a falta de colocarlle as escuadras de reforzo nas unións, que xa teño casi rematadas.

Tamén cortei xa as táboas necesarias para a cubrición do cuartel.

O seguinte día ensamblarei todo o conxunto e intentarei deixalo rematado.

Palmeirán

Armando as brazolas da bodega de popa

Outra escapada máis a Lorbé ó mediodia.

Antes de empezar co traballo tiven que achicar o barco porque as choivas dos últimos días fixeron que tivera bastante auga dentro.

Unha vez rematado o achique, estiven armando as brazolas da bodega de popa. Xa as tiña feitas de fai unhas semáns, e hoxe me puxen a asentalas no seu sitio, e unha vez asentadas, fixalas con uns bos tornillos de cabeza exagonal de inox.

As unións van a media madeira, xa que facer unha media cola de milano complicábaseme un pouco.

Practiquéille un pequeno rebaixe para que tapara as cabezas das táboas da cuberta.

Os tornillos van embutidos e irán cubertos cuns tapíns.

Ainda que non están rematadas, porque faltan os tapíns, dinlle unha man de Xylazel Roble Claro para deixalas protexidas do sol e da choiva.

Tamén xa tomei as medidas para empezar, o seguinte día, a facer o cuartel desa bodega.

Palmeirán

Facendo o cuartel do pañol de popa (III)

Nunha escapadiña ata Lorbé na hora de comer empecei a colocar as táboas da cubrición do bastidor.

Deixéille un voladizo de uns 2 cms por motivos estéticos e porque así xa sirven de asas para levantalo.

As táboas van unidas ó bastidor con tornillos de inox. Hai que ter moito coidado á hora de atornillalos, porque o elondo é unha madeira moi dura e o inox non soporta apenas torsión, co que, se te pasas un pouco apretando, parte o tornillo. Pasóume en duas ocasións, e iso que para facilitar o atornillado os embadurno primeiro con graxa.

Os tornillos van embutidos e logo os taparei cuns tapíns.

Nesta foto nótase a pequena curvatura para encaixar na cuberta da Balbina.

Quedóume unha táboa por colocar. Empecei polos costados para poder pechar logo no medio. Agora me atopo cun dilema: mercar unha peza de madeira de elondo e meterlle unha peza só dese tamaño ou aproveitar a madeira que xa teño no local que ten un ancho de 7cms e meterlle dúas pezas.

Posíblemente, por aforro de cartos será a segunda opción, e ó mellor por non complicarme facendo dúas pezas iguais,  meteréille unha enteira e un cacho de outra, ainda que o centro quede desplazado un pouquiño e non quede tan bonito estéticamente. Dependerá de como teña o día cando vaia a rematalo. Se estou vago será da maneira máis sinxela.

Como non me podía resistir, levéina ata a Balbina para ver como asentaba na cuberta, e a verdade é que lle queda como un traxe feito por un xastre. Encaixa á perfección.

Palmeirán

Facendo o cuartel do pañol de popa (II)

O sábado pola mañán continuei co bastidor para a tapa do pañol. Metinlle os dous reforzos nos ángulos e precintei cuns listóns o bastidor para que quedara escuadrado.

Lixei as unións a cola de milano para que quedasen igualadas.

Tamén preparei as primeiras táboas da cubrición de cada lado, ás que lles quitei o macho co cepillo, para empezar a ensamblalas o seguinte día.

Palmeirán

Facendo o cuartel do pañol de popa (I)

Hoxe venres acheguéime ó noso taller de Lorbé para empezar a facerlle a tapa do pañol de popa da Balbina.

Uns días antes xa preparei a madeira para facerlle o bastidor onde logo irán atornilladas as pezas da cubrición. Tiña pola casa uns sobrantes de madeira de elondo e penso que quedará bonito o contraste co piñeiro da cuberta.

A madeira é machiembrada, co que para facer o bastidor primeiro tiven que quitarlle o macho e a femia a base de cepillo.

Como a cuberta ten unha pequena curvatura, usei un peine de formas  para coller a inclinación da cuberta da Balbina, logo a proxectei sobre a peza e con un barrote de madeira funlle dando a forma precisa para poder marcala sobre a peza frontal e traseira do bastidor, que son as que levan a curvatura da cuberta.
 
O bastidor podíao atornillar simplemente ou cravalo, pero xa que asistin ós cursos de carpintaría de ribeira que organizamos Os Patexeiros, puxen en práctica algunhas unións que aprendín.

Como vedes unín as pezas a cola de milano. É unha unión bastante sinxela de facer, ainda que hai que ter ben claras as cousas porque senón podes ter que descartar algunha das pezas, como me pasou nesta ocasión que cortei unha que tiña que facer de macho, pensando que era femia. Bueno, todo o malo sexa ese. Fixen outra e morreu o conto.

Para reforzar o bastidor metinlle uns ángulos feitos coa mesma madeira e atornillados ás pezas de unión.

Acabáronseme os tornillos e tiven que deixar sen rematar dous dos ángulos.

Púxenme a cortar as táboas á medida para o seguinte día lixalas e atornillalas ó bastidor.

Espero que quede ben. Ten boa pinta.

Palmeirán